Ағылшын жазушысы Чарльз Диккенстің "Оливер Твистің бастан кешкендері" романы - жетім баланың аянышты тағдырын шынайы суреттейтін туынды. Дүниеге келе сала анадан айырылып, шіркеуге қарасты приход үйінде тәрбиеленген жетімектің басынан кешкен жан түршігерлік оқиғалары адамзат баласының жыртқыш айуанға да айнала алатынын, сонымен қатар жер бетінде мейірімді жандардың да аз емес екенін ұғындырады. Шынашақтай ғана Оливер Твис жетімдіктің қамытын сыпырып тастап, Лондонға қашқаны, Лондонда оны Феджин құрған ұрлықшылар тобы торына түсіргені, оның қылмыс әлемінен азаттыққа ұмтылғаны, бәрі-бәрі оқырманды өз тереңіне бойлатып әкетеді. Оливер Твис туралы өзгелердің өз мүддесіне сай айтылған пікіріне тұншыққан баланың жанайқайын сезіндіру, кейіпкермен бірге уайымдату, кейіпкермен бірге қуанту талантты жазушының ғана қолынан келетін іс. Осы орайда Чарльз Диккенстің шеберлігіне тәнті болмасқа шара жоқ.